დენტალური იმპლანტაცია

დენტალური იმპლანტი არის ტიტანის ხრახნი, რომელიც ყბის ძვალში ინერგება და დაკარგული კბილის ფესვს ანაცვლებს. მასზე ფიქსირდება გვირგვინი, ხიდი ან სრული პროთეზი. ეს დღეს ერთადერთი მეთოდია, რომელიც კბილს არა მარტო ვიზუალურად, არამედ ფუნქციურადაც სრულად აღადგენს - ძვალი განაგრძობს დატვირთვის მიღებას და არ იწყებს ატროფიას.

როგორ მიმდინარეობს მკურნალობა

პირველი ვიზიტი იწყება უფასო კონსულტაციითა და CBCT (3D) ტომოგრაფიით. ჩვენ ვზომავთ ძვლის სიმაღლესა და სისქეს, ვსაზღვრავთ ნერვის მდებარეობას და ციფრულად ვგეგმავთ იმპლანტის ზუსტ პოზიციას ჩადგმამდე. ეს ამცირებს ოპერაციის დროს და ხდის შედეგს პროგნოზირებადს.

იმპლანტის ჩადგმა ხდება ადგილობრივი გაუტკივარებით და საშუალოდ 30–40 წუთს გრძელდება ერთ კბილზე. თუ პაციენტს აქვს სტომატოლოგიური შიში, ვთავაზობთ სედაციას ან ზოგად ანესთეზიას - ეს განსაკუთრებით აქტუალურია მრავლობითი იმპლანტაციისას.

შემდეგ იწყება ოსეოინტეგრაციის პერიოდი - 3-დან 6 თვემდე, როცა ძვალი იმპლანტს ირგვლივ ერწყმის. ამ პერიოდში პაციენტი დადის დროებითი კონსტრუქციით, ანუ ესთეტიკის გარეშე არასდროს რჩება.

ბოლო ეტაპზე ვიღებთ ციფრულ ანაბეჭდს და ჩვენივე სატექნიკო ლაბორატორიაში მზადდება ინდივიდუალური გვირგვინი - ცირკონის ან მეტალოკერამიკის. ლაბორატორია კლინიკაშივეა, რაც ორთოპედიულ სამუშაოებს მნიშვნელოვნად აჩქარებს.

ძვლის დეფიციტი არ არის უკუჩვენება

თუ კბილი დიდი ხნის დაკარგულია, ძვალი ხშირად დაკლებულია. ამ შემთხვევაში ვასრულებთ ძვლის გადანერგვას (ავგმენტაციას) ან სინუს-ლიფტინგს. ეს ერთი-ორი თვით ახანგრძლივებს მკურნალობას, მაგრამ აძლევს იმპლანტს სტაბილურ საყრდენს.

რატომ Dream Dental

იმპლანტოლოგია კლინიკის ერთ-ერთი ძირითადი მიმართულებაა 2013 წლიდან. მთავარი ექიმი ბაჩო ჯიმშელეიშვილი არის ყბა-სახის ქირურგი და იმპლანტოლოგი, რაც ნიშნავს, რომ რთული ქეისებიც - ძვლის გადანერგვით, სინუს-ლიფტინგით ან სრული ყბის აღდგენით - ერთ კლინიკაში წყდება, გადამისამართების გარეშე.